Tashmë është bërë traditë prej disa vjetësh që revista Travel ju ofron listën e saj të vendeve të bukura për t`i vizituar në Shqipëri,  duke ju rekomanduar zona të panjohura, bukuri natyrore, itinerare interesante, zbulime të reja, vende që vlejnë të shihen së paku një herë në jetë apo edhe objekte me vlera të larta kulturore e historike. Kështu edhe në fillim të vitit 2016, sugjerimet e Travel magazine ishin dhjetë, duke bërë një përzgjedhje të objekteve më të bukura të trashëgimisë kulturore shqiptare, itinerareve të saj më interesante dhe përvojave më të veçanta.

Numri i parë i vitit i revistës Travel, është edhe numri ku ne ju propozojmë listën e "Best 2016". Këtë vit ju kemi propozuar "Best Things to See". Dy kanë qenë kriteret e përzgjedhjes këtë herë. Një listë tërësisht nga trashëgimia kulturore dhe objekte kryesisht të panjohura, krejt të reja ose të pavizitura. 
Një varg perlash të trashëgimisë tonë kulturore të nxjerra nga pluhuri i harresës, site të njohura por të pavizitura e objekte të restauruara, ide dhe projekte për shtigje të reja, gati për t`u përshkuar.