Ardian Fezollari - mjeshtri i fotopeisazhit shqiptar

Ardian Fezollari - mjeshtri i fotopeisazhit shqiptar

Written by Ilirjan Gjika on Wednesday, 05 February 2014. Posted in Blog

Një rrëfim i sinqertë për një artist të sinqertë

Ardian Fezollari - mjeshtri i fotopeisazhit shqiptar

Të gjithë e njohin për mjeshtër të fotografisë artistike. Dhe me të drejtë. Ai tashmë nuk është vetëm një figurë e njohur publike por edhe një pjesëmarrës në edicionet e shumë konkurseve kombëtare e ndëkombëtare të fotografisë artistike. Ndërkohë që me dhjetra punë të dala nga dora e mjeshtrit pogradecar janë ekspozuar përveç Shqipërisë edhe në Maqedoninë fqinje, Kosovë, Bullgari, Rumani, Austri, Danimarkë, Egjipt, e deri në Japoninë e largët.
Fotot e Ardian Fezollarit i gjen në kartolina turistike, postera, libra dhe botime te ndryshme, albume familjarë apo çiftesh të sapomartuar. Gjithashtu duke nisur që nga viti 2000 e në vijim, ai ka botuar edhe kalendarë lidhur me trashëgiminë kulturore, si në fushat e etnografisë, arkeologjisë dhe kishave të periudhës bizantine. Por Ardi siç e thërrasin të gjithë, ka botuar edhe një album fotografik të titulluar ‘’Landscape-Peisazhe’’, me foto kushtuar liqenit të Ohrit, një prej temave të tij më të preferuara.

Kësaj liste mund ti shtonim edhe shumë hollësi të tjera sepse në fushën e fotopejsazhit dhe fototrashëgimnisë, Fezollari ka shumë atribute dhe kontribute, por shumë pak njerëz e dinë që fotografi i njohur në profesionin e  mirëfilltë është oficer policie. Ndërkohë që në rininë e tij, ai ka patur si pasion basketbollin. Për shumë vite ka luajtur duke mbrojtur ngjyrat e skuadrës së qytetit të tij Pogradecit, ndërsa më vonë në vitet 1980, ka luajtur edhe për skuadrat më të njohura të ktij sporti në Shqipëri, Partizanin dhe Dinamon .
Por cili është Ardian Fezollari, i parë tashmë jashtë  fokusit të aparatit fotografik?
Lindur në Pogradec në 27 mars të vitit 1968, ai është diplomuar në Akademinë e Policisë. I specializuar në një fushë të veçantë si Kriminalistika, aktualisht ai punon si oficer policie në Drejtorinë e Policisë së Qarkut Korçë. Ndërsa fotografinë artistike e ka pasion të vjetër dhe vetëm diku rreth vitit 1994 nisi t’i kushtohet seriozisht.  Kështu, pas disa vitesh erdhi edhe ekspozita e parë, e cila daton pikërisht në vitin 1996 në VEVE Group Buissnes Center-Tirana.
 Ndërkohë që në vitin 2000 nderohet edhe me çmimin e tretë nga Angjencia Kombëtare e Turizmit, gjatë një konkursi të organizuar lidhur me turizmin shqiptar. Ndërsa që nga viti 2003 është pjesëmarrës në të gjitha eventet e organizuara në vend lidhur me fotografinë artistike si në konkursiet Marubi, Fokus, Gjon Mili, etj.  Aktualisht po punon për një album me foto nga rrethi i Pogradecit. 
Si të gjithë artistët e shumtë të Pogradecit edhe Ardian Fezollari nuk i shpëtoi dot ngasjes ndaj të bukurës, që natyra ia ka dhënë  shumë dorëlëshuar këtij qyteti. Të gjitha vendet piktoreske dhe të bukura lindin artistë të mirëfilltë, thotë diku një estet i njohur. Kësaj kaste iu bashkua dikur edhe Fezollari për tu bërë sot një nga fotografët më të njohur shqiptarë dhe më i shquari ndër ta në gjininë e fotopeisazhit.
Ndërkohë që ‘’Magjia e Liqerit’’ do të ishte ajo që do ta dehte më shumë se të tjerat, ashtu siç kishte bërë më parë edhe me bashkëqytetarët e tij, si poetin Lasgush, prozatorin Kutel, apo mjeshtrat e penelit si Tason, Skënder Lakon, Vangjo Vasilin apo Gentian Zekën . Por ndryshe nga të tjerët Ardiani do ta “skaliste” atë, aq të bukur sa ç’është, me fokusin e aparatit të tij.
Megjithëse sot ai ruan në arkivin e tij me mijëra shkrepje të objektivave të ndryshëm, gjithsesi në epiqendër të tyre mbetet përsëri ai, Liqeri, së bashku me malin e Thatë, Volorekën, Linin, varkat, njerëzit dhe pulëbardhat…
“Ai më josh gjithnjë e më tepër”, tregon Fezollari për të, sepse mbi të gjitha për syrin tim prej artisti ka lindjen më të bukur të diellit’’.
Ndërsa një nga njohësit më të mirë të tij, kritiku, Luan Topçiu me të drejtë i ka quajtur këto foto, si ‘’Albumi i Liqenit dhe i Dritës’’.
Pra, ky është të dashur miq, Ardian Fezollari, artisti i shijeve të kultivuara që nuk ndalet këtu, por me aparatin në krahë vrapon drejt objektivave dhe sfidave të reja.        
 

1.0/5 rating (1 votes)

Hits

4296

About the Author

Ilirjan Gjika

Gazetar, historian, studiues. Nje nga bashkepunetoret e pare te Revistes Travel, mjaft aktiv ne shtypin e perditshem dhe botues i disa librave ne fushen e histori-arkeologjise. 

Leave a comment

Please login to leave a comment. Optional login below.